بحبك وصعب عليا

[ندعوك للتسجيل في المنتدى أو التعريف بنفسك لمعاينة هذا الرابط]

موقف صعب فعلا ً
و الأصعب منه إحساسه
و الأصعب أنك تحسه
صعب أشوف حاجة عند حد وهي مش عندي
و الأصعب أنها كانت عندى وراحت منى
ومش قادر أرجعها تانى
وهي لايمكن ترجع
عارفين ليه ؟! لأن دي روح
حياة إنسان هرجعها إزاى
شيء في إيد ربنا بس أنا مفتقدها
أنا بحبك يا أمى
أمى راحت منى ومش عارف أرجعها
بس هي وحشتني أوى
وقلبي بيدق لما بفتكرها
وافتكرها ليه
هو أنا من امتى نسيتها
ده أنا حتى مش فاكر شكلها
أعمل إيه ما أنا كنت طفل لما ماتت
عارفين يعني إيه طفل ؟!
طفل لسة مدخلش المدرسة حتي
هفتكر شكلها أو أعرفه إزاى
بس برضه بتوحشني
حبيبتي يا أمى
مش قدامى غير إنى أصبر
يا أروحلها يا أتحمل قضاء ربنا
أنا هستني
أنا بحبك من الصور يا أمى
بس كان نفسي أشوفك قدامى يا حبيبتي
أنتى مش عارفة أد إيه عيد الأم لما بيجي بيقطع فيا
أنتى مش عارفة أد إيه أغنية ست الحبايب بتأثر فيا
أنا جوايا بصرخ يا أمى
أنا ببكي كل يوم
ببكي ومحدش حاسس بيا
مش سهل عليا إن حد يقولى ده ماما حضرتلى فطار النهاردة
مش سهل عليا إن حد يقولى أنا مش عارفة أجيب إيه هدية لماما سواء في عيد ميلادها أو عيد الأم
مش سهل عليا إن تيجى مناسبة زي دي ومش الأقيكى جنبى
يا ماما وجودك حنبى هو اللى هيفرحنى
أنا يا أمى لما بتكلم مع حد بعيط ومش عارف ليه
علشان تعرفى إنى مش ناسيكى
وإنى بموت فيكى
أنا بموت كل يوم على فراقك
نفسى أشوفك وأحس بيكى
نفسى فى حضنك تضمينى
نفسى بحبك تدفينى
نفسى ومش قادر
نفسى ومش هينفع
نفسى وأعمل إيه
يا أمى وحشتينى
وحشتينى وصعب عليا فراقك
فراقك بيقطع فيا
بيقطع قلبى وبينزف
بينزف من حبه فيكى
بينزف علشان مستنيكى
مستنيكى تحسيه فى يوم
حستيه يوم ولادتى
بس بفراقك ضاعت سعادتى
وتاهت منى الأيام وتايه
أنا عايش على أمل لقاكى
أنا حاسس إنك رجعالى
الدنبا بعدك عذبتنى
والأيام صعبة وتوهتنى
والفرقة وحشة ودمرتنى
وليه يا دنيا تفرقينا
ده إحنا الحزن فينا ومالينا
والجراح دى بتكفينا
ليه يا دنيا بتجرحينا
ليه من أعز الناس تاخدينا
ليه يا دنيا وبرضه ليه
ليه بتحبى الفرقة ليه
ده إحساس أتحمله ليه
ده إحساس مش قادر عليه
وأنا ليه أتحمله ليه
أنا عايز أروح لأمى
أنا عايش فى الدنيا لوحدى
مهما كانت الناس موجودة
محدش هيقدر ’بعدى
أمى بس اللى تحس بيا
أمى هى الدنيا هى
هتخلى الحياة وردية
إمتى يا أمى راجعة ليا
بحبك وصعب عليا
فراقك ده بيقطع فيا
ومحدش حاسس بيا
أمى كل يوم بموت
أنا عايش الحياة فى سكوت
ومش قادر أعمل صمود
قلبى يصرخ من غير أى صوت
وعينى تدمع وتقول بموت
عينى تقولى حس بيا
ولا أنت نسيت اللى فيا
أنا شفتها وكانت ليا
بس دلوقتى صعبة عليا
أوعى تنسى إنى منك
أوعى تفكر إنى أضمك
أنا بس أدمع لحزنك
أمك فى يوم كانت تضمك
ومحدش هيحس قلبك
أمك كانت شايلة همك
وبتحزن على كل حزنك
أوعى تفكر يوم تنساها
دى هى كانت إنسانة
وحقيقى أجمل إنسانة

تسلم ايدك ياسلمي

مرسي ياانوس

» حصريا اغنية تامر حسنى بحبك يامصر
» تامر حسنى يهدى"بحبك يا مصر" للمنتخب المصرى
» حصريا كليب تامر حسنى بحبك يا مصر اهداء للمنتخب المصرى على أكثر من سيرفر رابطه عشاق النجم تامر حسنى